A praia de Arou acollerá unha campaña educativa sobre xestión de residuos e desperdicio alimentario
·
O próximo sábado, 6 de xullo, a praia de Arou no Concello de Camariñas será o escenario onde se leve a cabo o proxecto ‘Reparas?’, unha campaña educativa itinerante sobre prevención, reutilización, reciclaxe e compostaxe dos residuos urbanos.
A través desta campaña, promovida pola Consellería de Medio Ambiente, Territorio e Vivenda co fin de fomentar a correcta xestión dos residuos domésticos, un equipo de monitores medioambientais desenvolverán de 10 a 14 horas na praia de Arou actividades para os máis pequenos e tamén para adultos.
Entre estas actividades están unha exposición de paneis con proxeccións audiovisuais de contido ambiental, información e divulgación sobre os contidos da exposición, actividades dinámicas e tamén se atenderán as dúbidas e consultas do público.
Todas as actividades son gratuítas e abertas ao público que se achegue á praia de Arou. Para máis información: Área de desenvolvemento local de Camariñas. 981 737 004 adl@camarinas.net www.camarinas.net.
Fonte- Concello de Camariñas
