A percebeira, portavoz municipal do PP e deputada autonómica camariñana recibirá o xoves o galardón «As Boas Prácticas» do Proxecto Máscaras.
Paula Mouzo vai ser recoñecida este xoves, 21 de setembro na Coruña, co premio As Boas Prácticas Cidadáns 2023 nun acto que se desenvolverá desde as 7 da tarde no salón actos da Fundación Once da Coruña.
Mouzo Mas é percebeira, portavoz do PP no concello de Camariñas, deputada autonómica, e futbolista do equipo feminino da súa vila.En anteriores edicións entre os galardonados figuraban outros dous veciños da comarca moi comprometidos socialmente: Xose Manuel Barros e Rafael Lema. Barros, da activa asociación Mar de Fábula e Lema, escritor, investigador naval e presidente do Colectivo PX.
Boas Prácticas Cidadás
O Proxecto Máscaras e unha asociación que selecciona cada ano a sete persoas de toda Galicia de distintos ámbitos no premio Boas Prácticas Cidadás, que neste ano 2023 vai xa pola súa VII edición
O obxectivo destes recoñecementos é contribuír á visibilidade da interactuación cidadá e as experiencias positivas que permiten identificar o activismo e o voluntariado como un concepto máis estendido e máis próximo, tanto a nivel persoal como profesional e institucional. A asociación entende que a sociedade non é un ente abstracto dividido en compartimentos estancos, senon un ecosistema que interactúa en rede, polo que unha boa práctica en calquera ámbito pode exercer un contaxio positivo en outros.
Por iso, no ánimo de promover eses lazos de unión entre a cidadanía, o xurado de cada convocatoria está composto polas persoas que, a título persoal ou en representación dun proxecto, recibiron o recoñecemento na convocatoria anterior.
