Man de Camelle conta cun novo libro tras o recén editado por Tracy Saunders. Na fin de semana no Culturgal de Pontevedra, a feira cultural máis importante de Galicia, foi a presentación do libro «Man de Camelle», realizado por Carmen Hermo e editado por Kalandraka. Na cita a autora estivo acompañada polo artista muxián Antón Castro. Non faltaron ao evento representantes locais como o concelleiro de Obras do Concello de Camariñas e responsable do Museo Man de Camelle Juan Carlos Canosa.
Quince anos arredor do legado de Man
A autora leva 15 anos traballando arredor do arte de Manfred Gnadinger. Pola súa relación co Concello de Camariñas Hermo é a comisaria da exposición permanente no Museo de Man de Camelle, aberto dende 2015. Este mes vai ser presentado en Camariñas. A autora conta unha historia polifónica a través de ilustracións, polo que se trata propiamente dun caderno de arte, de debuxos interpretando o legado de Man.
O Museo Man forma parte da Rede REMA de Espazos Museísticos do Atlántico, e da ‘European Outsider Art Asociation’, unha asociación europea de museos de arte marxinal que conta con 89 membros en total dos que unicamente 8 son exposicións españolas.
