O voceiro de educación do PSdG-PSOE, Guillermo Meijón participou nunha charla en Fisterra, onde criticou as políticas levadas a cabo nesta materia pola Xunta de Galicia, neste primeiro ano de goberno do Partido Popular.
Meijón estivo acompañado polo secretario provincial de educación do PSOE, Antonio Álvarez, e pola coordinadora comarcal, Nieves Lema Vilariño.
O portavoz de educación do PSOE no Parlamento, pensa que este foi un ano perdido, “no que se perdeu o dereito da gratuidade de texto consolidado polo goberno anterior cun socialista o fronte”.
Esa retirada dun dereito recoñecido e universal supuxo para a Costa da Morte que ningunha familia de Carnota, Cee, Corcubión, Dumbría, Vimianzo e Zas percibiu a máxima axuda para libros de texto. Segundo o PSOE, foron moitos os alumnos da Costa da Morte que quedaron completamente excluídos das axudas e que antes ningunha familia tiña por qué pagar un euro polos libros de texto.
Tamén se referiron o decreto do galego co que “certificaron a ruptura do consenso social respecto da lingua, crearon un conflito cidadán onde non existía”. E aseguran que o goberno Feijóo está apoiando os colexios privados e concertados en detrimento dos públicos.
